Gi-imbestigahan na sa kapolisan kung si kinsa ang responsabli nga mibutang sa napalgan nga gituohang IED o Improvise Explosive Device tunga-tunga sa barangay road sa Purok 2 Sitio Kawayanon Barangay Ligoron Talakag Bukidnon.
Sumala ni Talakag Municipal Police Station Deputy Station Commander Police Lt. Jim Olayon Luton nga una sila nakadawat og impormasyon gikan sa nagpakabanang lungsuranon kalabot sa gi-ingong bomba nga nakita sa dalan.
Dali dayon mihimo og aksyon ang kapolisan ug gi-cordon ang area ug mi-request sa presensya sa EOD o Explosive Ordnance Disposal Team.
Sa gipahigayon nga proseso, diha-diha rasab nga gi-dispose sa EOD team ang napalgan nga gituohang bomba.
Subay nagpasalamat si Lt. Luton sa mga nagpabakana nga katawhan sa pag-report sa susama nga insidente, ug padayon kini nga nanawagan nga ugaling dunay susama nga mamatikdan nga butang o indibidwal, mahinungdan gayud ang paghatag og impormasyon ngadto sa orotidad aron marespondehan.