Madali eon lang mapabahin sa UNESCO Intangible Cultural Heritage list ro Haboe Piña sa Aklan.
Suno kay Sangguniang Bayan member Phillip Yerro Kimpo it Kalibo, sambilog raya sa manami nga balita matapos ro meeting nga ginpatigayun it Kalibo Council for the Haboe Piña (KCHP).
Suno pa kay SB Kimpo, para magbunga ro nasambit nga nominasyon it piña weaving sa UNESCO, may pila pang tikang nga kinhangean nga ubrahon ro gobyerno ag private stakeholders.
Sambilog pang manami nga development ro pag-organisa it KCHP ag Aklan Fashion Designers Association it sangka mala-“Project Runway” nga fashion design competition nga magagamit sa piña cloth.
Masadya segun si Kimpo nga makitang aktibo ro Haboe Piña Council, nga ginkrear it anang gin-author nga laye para sa proteksiyon ag promosyon it “Queen of Philippine Fibers.” // ANN DESLENE SALAZAR