Nagsumite ng kani-kanilang entries ang ilang mga lokal na pamahalaan sa Bicol para sa National Search for Outstanding Coastal Community 2021 sa ilalim ng Malinis at Masaganang Karagatan (MMK) program ng Bureau of Fisheries and Aquatic Resources (BFAR).
Lumahok sa nasabing kompetisyon ang Gubat at Sta. Magdalena mula sa Sorsogon; San Jose at Tinambac sa Camarines Sur; Ligao City ng Albay at mga bayan ng Mercedes at Jose Panganiban sa Camarines Norte.
Ayon kay Nonie Enolva, tagapagsalita ng BFAR Bicol, bago makuha ang nasabing parangal ay kinakailangan munang maipasa ang mga kriteria tulad ng mahusay na pagpapatupad ng batas sa pangisdaan ng munisipyo, may 10 regulasyong pinagtibay sa pamamagitan ng mga ordinansa, mga resolusyon ng Sangguniang Bayan o lunsod at mga kautusang administratibo.
Kabilang sa mga regulasyong ito ang proteksyon at pag-iingat ng mga yamang baybayin ng mga hangganan ng tubig sa munisipyo.
Ang mga LGU ay mayroon ding regular na paglalaanan ng pondo para sa pamamahala ng yamang baybayin at marami pang iba.
Samantala, nasungkit ng LGU ng Sagñay, Camarines Sur ang ikatlong puwesto para sa National Search for Outstanding Coastal Community 2021 sa ilalim ng nabanggit din na programa.
Ayon pa kay Enolva, tatanggap ang LGU ng P10 milyong halaga ng mga proyektong pangisdaan sa kabuhayan.
Ang nasabing halaga ay dapat gamitin para sa mga programang partikular na inilaan para sa mga mangingisda sa munisipyo.
Sinabi ng opisyal, ang mga iminungkahing proyekto ay maaaring kabilang ang mga tungkol sa kabuhayan, pagsasanay, pamamahala ng mapagkukunan sa baybayin, aktibidad sa pagpapatupad ng batas sa pangisdaan, o pagbuo ng kapasidad.