Naka-quarantine karon ang tanang pasahero, drayber ug konduktor sa usa ka bus nga niabot sa dakbayan human dunay usa ka pasahero ang nagpositibo sa COVID-19.
Sumala kang City Health Office Acting Head ug Davao City COVID-19 Task Force focal person Dr. Ashley Lopez, ang maong pasahero usa ka returning resident sa Davao City.
Matud ni Lopez, gikan ang pasyente sa Cebu og didto nagpa swab test apan wala makahulat sa resulta og nibyahe sakay sa barko padulong sa Cagayan de Oro City dayon nideretso sa Davao sakay sa usa ka bus ayha nadawat ang resulta nga positibo siya sa kagaw.
Hinoon dali nga naisolate ang pasyenteng returning resident sa temporary treatment and monitoring facility o TTMF samtang ang kapin 30 ka pasahero gipang-quarantine sa tent city og takdang ipailawum sa swab test. Tungod sa maong insedente, gipahinumduman sa opisyal ang mga mosulod sa syudad nga sundon ang health protocols ug safety measures sa syudad ilabi na sa mga returning residents kung diin kinahanglan mag presenta og 24-72 hours negative RT-PCR test result. BNFM-DAVAO