PIPILA ka mga ‘factor’ ang nakita sa medical experts sa pag-ubos sa kaso sa Covid-19 sa General Santos City.
Matud ni Dr. Ryan Aplicador, Chief of Hospital sa Dr. Jorge P. Royeca Hospital (DJRPH) dako og natabang sa pag-ubos sa kaso ang pagsunod sa publiko sa minimum health protocols human nahadlok sa epekto sa pagsaka sa kaso sa virus nakalabay’ng bulan.
Asa miawas na ang mga pasyente sa mga ospital ug nahutdan na og medical oxygen ang mga tambalanan. Nakatabang usab ang pagsaka sa ihap sa nagbakuna batok Covid-19 dungan sa nagpadayong vaccination rollout. Gihingusgan ni Dr. Aplicador nga dili ‘artificial’ ang pag-ubos sa kaso tungod sa nagka-ubos usab nga admission sa mga ospital ug sa positivity rate.
Una nang, gibutyag ni Dr. Dyan Zubelle Parayao, DOH-12 Chief sa Regional Epidemiology and Surveillance Unit (RESU) nga gikan sa high risk naa na sa medium risk karon ang Soccsksargen region. Sa ulahing rekord sa DOH-12 tracker naa na lang 500 ang aktibong kaso sa virus sa GenSan. ( Richel Gubalani)