BICOL— Sa ibong kan padagos na pagirudom kan gobyerno lokal nin Catanduanes sa gabos na mga muyang magparibod sa isla na bawal pa maglaug ang mga bako mang APOR asin mayong importanteng kalakawan, padagos paman na nakaka engkwentro an mga personahe kan border control point nin mga matatagas asin madudunong ang pamayo.
Suogma kaya, limang mga biyahero gikan sa National Capital Region ang nadakop kan Philippine Coastguard makalihis ang mga ining mag pulbar na maglaug sa isla sakay nin baruto.
Sa impormasyon na nakaabot sa Brigada News FM-Bicol, inihayag ni Information Officer Nikko Templonuevo na tig denied asin dae naaprubahan ang S-PaSS kan mga ini kaya dae natugutan na magsakay sa barko puon sa Tabaco Port pasiring sa Catanduanes.
Huli kaini, nag arkila ang limang mga nadakop nin baruto sa bangkerong taga Brgy. Rawis asin nag pulbar sa maglusot palaug sa probinsya alagad dae an mga ini nag trayumpo makalihis na mabagat kan mga otoridad sa baybayon kan Brgy. Mayngaway sa banwaan nin San Andres.
Napag-araman, na ang apat sa limang biyahero ang residente sa banwaan nin Viga mantang saro sa mga ini ang residente kan Caramoran.
Sa ngunyan, tigbeberipikar pa kung lehitimo ang mga tig presenta kaining COVID-19 test result mantang nakatalaan sindang sangatan nin kaso manunungod sa naging pagbalar kan mga ini dapit sa ipinasusunod na protocols kan probinsya basado sa guidelines kan Bicol IATF.##
