Magtiayon taga Jose Abad Santos mibalik sa Brigada aron magpasalamat sa nadawat nga tabang

NAGPASALAMAT sa Brigada ang magtiayong Cabca nga taga Jose Abad Santos, Davao Occidental human nga nakadawat og tabang gikan sa pagpanawagan nila alang sa ilang anak. Si Arcelita Cabca, ang nanawagan sa Brigada mga miaging semana alang sa kinsa mang may malumong kasing kasing nga makatabang sa ilang pinansyal nga panginahanglanon alang sa stainless nga gamiton sa anak.

Tuod man gidungog ang iyang panawagan ug nakatigom og P20,000 nga paigo alang sa operasyon sa ospital ug mataud ang stainless.

Kauban ang bana nga si Ernesto Cabca, nagpasalamat sila tungod kung dili sa ilang panawagan sa Brigada, dili madunggan ang ilang pagpangayo og tabang ug nagpasalamat usab sa Ginoo.

Matud sa magtiayon mibalik sila sa Brigada aron nga magpasalamat sa tanang mitabang, gikan sa mayor sa Jose Abad Santos, ingon man sa ilang bise mayor, kapitan sa barangay, mga kabanay ug bisan sa mga mismong kaubanang pasyente sa Dr. Jorge P.Royeca Hospital ug kang Dr. Solamo. Gihatag na matud pa ni Ginang Arcelita ang P20-K sa doktor aron nga itakda ang operasyon ning semana. Ang gamitong saklay na lang ug resita ang ilang pangitaan usab og pamaagi.