NALIPAY ang pipila sa mga vendors sa GenSan nga nagapaninda og gabie tungod daghan ang mga kostumer nga nagakaon ug nagapalit sa ilang baligya.
Nahurot ang walo ka kilo bugas nga gilung-ag ni Rasel Sali sa pagbaligya niini og pastil sa Pioneer Avenue, Dadiangas South tungod daghan sumala pa ang nagapamalit ug nagakaon matag gabei.
Nagasugod kini sa pagpaninda alas 5 sa hapon hangtod alas 2 sa kadlawon hangtod nga naa pay mga kostumer. Kadaghanan sa ilang mga kostumer mga estudyante ug trabahante.
Mokita kini og kapin 2,000 hangtod 4,000 matag gabei. Pabor usab alang ni juvenni acosta ang pagpaninda og gabei sa barangay fatima kay daghan siya og suki sa maong lugar nga nagapalit sa iyang baligya nga mga balut, noodles, kape ug pastil.
Modagsa matud pa ang mga kostumer sugod ting-panihapon hanghtod na sa gabei ug kadlawon. Alang sa mga night vendors dakong tabang ang subli nga pagbalik sa ekonomiya sa gensan kay makahigayon na sila sa pagpamaligya gumikan wala nay curfew hour.
Ang ilang kita mas dako matud pa sa karon kung itandi sa mga milabay nga tuig sa miigo ang pandemya. Ang matag-gabei nga kita sa mga nasangpit nakatabang sumala pa sa pagkinahanglan sa ilang mga pamilya. I Enamie Mogpon