LEGAZPI CITY – Dai man pignegaran kan nagkapirang mga residente kan Brgy. Bascaran, Daraga, Albay na wara sindang ibang namatean kundi takot makalihis na personal na mahiling asin madangog an engkwentro asin paralitan nin putok ki mga badil sa pagultanan kan NPA asin kapulisan sa lugar kan nakalihis na Martes, Oktubre 3.
Sa intrevista kan Brigada News FM Legazpi kay alyas “Son”, nag-iirahay siya kan kudal ninda kan mangyari an engkwentro.
Kan madangog an mga putok kan badil, tulos su boot siyang duminulag paparayo asin tuminago durante kan takot.
Makalihis an sarong aldaw puon kan engkwentro, dai pa su boot saiya nahahali an takot na namatean.
Siring man sa saro pang residente na tricycle driver, takutunon siya kan nangyari an engkwentro.
Nakaparada sana kaya siya kaito asin naghahalat nin pasahero harani sa lugar kan engkwentro, asin kan madangog an mga putok, nakadapa tulos siya huli sa takot.
Segun sa iya, uminabot man sa 15 minutos na nagtenir siya sa siring na posisyon.
Mientrastanto, pirang minuto nagparalitan nin putok an mga NPA asin kapulisan sa nasambit na insidente.
Kun babalikan, haros maga-alas sais nin banggi ito nangyari mantang nagsasagibo an mga pulis nin traffic decongestion.
An engkwentro, nagresulta sa pagkagadan kan 2 miyembro kan NPA na parehong may alangkaw na posisyon.