Padayon karong giimbistigahan sa kapulisan pagpusil patay sa usa ka negosyanteng giiila nga si Antonio Ramos Fabian, 63 anyos, tag-iya sa Fabian Farm sa Purok 23, Barangay Mesaoy lungsod New Corella,Davao Del Norte.
Subay sa impormasyon gikan sa New Corella Police Station, posibleng personal grudge ang motibo pagpatay sa biktima sanglit wala gidamay sa mga suspek ang iyang mag-inahan.
Una niini, gabie niadtong Domingo, pugsanong gisulod sa duha ka wala mailhing mga suspek ang pultahan sa ilang truck house sulod sa ilang farm dayon gipusil ang biktima.
Swerte nga wala gidamay ang kapuyo niini ug ang 5-anyos nga bata apan ang biktima nabugtuan sa iyang ginhawa pag-abot sa Municipal Health Office.
Nakarekober gikan sa crime scene ang lima ka basiyo sa bala sa gitoohang .45 caliber pistol.
Nasayran usab sa mga imbistigador nga dunay obligasyon ang biktima sa tag-iya sa yuta nag wala pa niini mabayari apan wala usab gibalewala ang uban pang posibleng anggulo sa krimen. BNFM-DAVAO
