Ginkakas sa pwesto bilang Assistant Provincial Administrator si Negros Occidental Comprehensive Health Program Division ( NOCHP) officer-in-charge Ma. Mina Pellejo samtang duha iban pa nga empleyado sang Kapitolyo Probinsyal ang suspendido, ini ang gin-annunsyar ni provincial legal officer Atty. Alberto Nellas, Jr.
Ginpahayag ni Nellas matapos ma-finalisar ang ginpatigayon nga imbestigasyon kag pagpamati sa kaso ni Pellejo, gin-rekomendar sang iya talatapan kay Governor Eugenio Jose Lacson ang gilayun nga pag-“dismiss” sa iya sa katungdanan.
Matapos maaprubahan sang gobernador ginserbe sang provincial legal office ang ‘dismissal order’ kay Pellejo sadtong nagligad nga Febrero 24, 2022, huwebes.
Ginklaro ni Nellas pwede maapelar ni Pellejo ang pagka-dismiss sa iya sa pwesto kun sa diin kinamatarong sang isa ka “public officer” gin-dismiss sa pwesto nga maka-file sang ‘motion for reconsideration’.
Ang pag-pagpahalin kay Pellejo ang sandig sa ginapangatubang sini nga kaso nga “grave misconduct” kag “gross neglect of duty” may kaangtanan sa ‘mis-handling’ sang budget samtang ini ang nagapangalagad bilang OIC sang NOCHP. Ang pag-dismiss sang isa ka empleyado sang gobyerno nagakahulugan sang “forefeiture” sang tanan niya sini nga benepisyo, suno kay Atty. Nellas.
Samtang, suspendido sa sulod sang 60 ka adlaw ang Officer-In-Charge sang provincial Human Resource Management Office (PHRMO) nga si Filomena Gozon nga miyembro sang provincial ‘selection committee’ upod kay Daidei Lopez sang PHRMO kag Secretariat sang amo nga komitiba.
Ginsiling sang provincial legal officer, nakasumiter na ang duha sang ila sabat sa ginpapanaog sa ila nga show caused order sadtong nagligad nga tuig kag pagkatapos nahuman ang ila sini nga “investigation report”, ginrekomendar sang iya talatapan sa gobernador ang pagpasaka sang panumbungon sa kaso nga “falsification of an official document” kag “dishonesty”.
Kahapon nga adlaw, miyerkules, Marso 2 ginserbe sang provincial legal office ang “formal charge”, “investigation report” kag ang “preventive suspension” para sa ila nanday Gozon kag Lopez.