MIKABAT sa P10,000 ang natigom sa Brigadahan program sulod sa duha ka oras nga panawagan alang sa 7-anyos nga bata nga adunay problema sa iyang tiyan.
Ang maong kantidad ang gihatag sa mga miyembro ug dili miyembro sa Brigadahan alang kang France Nathan Jed Paule, 7-anyos, taga purok 3, Greenfield Phase 3, Brgy.Mabuhay.
Segun ni Mesiann Mindon, 53-anyos, inahan ni Nathan nga naay gastric disorder ang anak ug kinahanglan nga ma biopsy aron masuta kung operahan.
Kini tungod halos kada tulo ka semana kining dili makapagawas sa hugaw ug bugtong paghilak lang ug pagtudlo sa iyang tiyan ang mahimo tungod usa usab ka austic ang bata.
Naga-agad lang si Nanay Mesiann sa ilang karenderya ug bana nga gamaneho og trisikel mao nga maglisod sila sa pagpa-opera.
Sa nadawat nga tabang, gipasalig ni Mesiann nga unahon ang panginahanglan sa iyang anak aron nga masulbad na ang sakit niini sa tiyan.