LEGAZPI CITY – Pighayag kan Philippine National Railways (PNR) Legazpi na plano pa sana kan Department of Transportation (DOTr) na magkaigwa nin byaheng Naga City pasiring sa Legazpi City vice versa.
Ini an sinabi ni PNR Legazpi Department Manager Ruben Besmonte sa intrivista kan Brigada News FM Legazpi.
Alagad, segun kay Besmonte, dae pa natututukan kan nasambit na ahensya na mabugtakan ki istasyon kan train harani sa Bicol International Airport (BIA) sa Alobo, Daraga, Albay nin huli ta dai pa man ini pigpaprayoridad kan gobyerno.
An solamenteng tinawan nin atensyon, iyo an may rutang Naga – Legazpi, mantang an Metro Manila – Pampanga asin Metro Manila – Laguna, nasa plano naman na buksan ngunyan na taon.
Segun pa kay Besmonte, sa ngunyan nasa feasibility study pa ini asin nagpaplano pa sana tanganing mapakaray ini sa maabot na panahon.
Kun may mga pagbabago su boot sa mga plano, nasa DOTr na ini nganing matawan nin marhay na serbisyo an mga commuters asin nganing magin mahiwas an bulos kan trapiko sa tinampo.