BICOL – IPINAHAYAG kan Philippine Statistics Authority o PSA-Bicol na nakasentro an pagcelebrar kan Civil Registration Month ngunyan na bulan nin Pebrero sa pagpapakaray kan saindang sistema gamit an makabagong teknolohiya.
Segun mismo ki Regional Director Cynthia Perdiz, parte na kan buhay kan lambang tawo an innovation asin digital transformation kun kaya sinda man soboot sa PSA an kaipuhan na pakusugon an saindang civil registration system para sa mga namamanwaan na Pilipino.
Dakul na mga sistema an pigagagamit sa ngunyan urog na sa pagko-code kan causes of death asin importante soboot na macierto an kalidad kan vital statistics na nakukua sa civil registration system na iyo soboot guide kan mga planners asin policy makers urog na ngunyan na panahon nin pandemya.
Magigiromdoman na kan Pebrero uno kan mag anunciar an PSA-Bicol na magpautob an saindang ahensya nin “No appointment, No transaction” policy sa saindang mga outlets.
Segun digdi, kaipuhan soboot magpahiling nin appointment slip para makapagpaproseso o makapag-request nin anuman na dokumento gikan sa saindang oficina asin mismong may sadiri o otorisadong indibidwal sana an tutugutan.
Paliwanag ni Perdiz, an pagpapautob kan nasabing polisiya iyo an saro sa mga lakdang tanganing macierto an compliance kan ahensya sa data privacy act siring man pagsunod sa ipapautob na health protocols tanganing malabanan an paglakop kan covid-19.