Apektado ang pagpadala og swab samples sa mga Matinians nga close contacts sa mga pasyenteng dunay Covid-19 human magguba ang molecular laboratory extraction machine sa Southern Philippines Medical Center sugod sa miaging semana.
Ang maong makina ang responsable sa pagdetect sa Covid-19 ngadto sa mga gisumiteng swab samples sa maong ospital.
Sumala sa Mati IMT, nga duna silay nasumite nga 120 swab samples niadtong miaging semana nga hangtud niadtong Setyembre 13 wala pa gihapon migawas ang resulta.
Apan nahibaw-an nga dali nang gitunol sa SPMC ang mga swab samples ngadto sa laing ospital aron kini maproseso.
Samtang guba ang makina sa SPMC, nakapangita hinoon og laing alternatibong ospital ang Mati IMT nga muproseso sa mga swab samples sa Matinians nga ang Davao Regional Medical Center.
Aminado hinoon ang Mati IMT nga mikunhod ang numero sa swab samples na ilang mapadala sa DRMC sa Tagum City kumpara sa ilang ginapadala ngadto sa SPMC. Nahibaw-ang muabot ngadto sa 260 swab samples ang ginapadala sa mati IMT ngadto sa SPMC matag adlaw bag-o pa nagguba ang makina niini.
Bisan ang Davao City apektado usab sa maong panghitabo hinungdan nga ila usa giundang ang pagdawat sa swab samples gikan sa F2 ug F3 kon 2nd and 3rd generations nga mga indibidwal sugod niadtong Setyembre 13.
Nahibaw-an nga ang laboratory sa SPMC ug sa Los Amigos mahimong makaproseso og 1,500 specimens matag adlaw. Apan mibaba na lang kini ngadto sa 450 specimens matag adlaw sa pagkakaron.
