LEGAZPI CITY – Suportado ni Senator Cynthia Villar bilang Chairperson kan Senate Committee on Environment and Agriculture an pagkakaigwa ki Agricultural Engineer huli ta saro sa mga problema na kinakahampang kan nasyon iyo an mechanization.
Sa isinagibong ribbon-cutting ceremony kan Agri-Production and Machinery Exhibit katakod kan Philippine Society of Agriculture and Biosystems Engineers (PSABE) Convention sa syudad nin Legazpi, sinabi kan senadora na dapat ipromotir kan gobyerno na magkaigwa nin bagong makinarya an mga paraoma para sa pagtatanom, harvesting, milling, drying asin processing na makakatabang sa pagpapababa sa presyo kan produksyon asin labor cost.
Nagtutubod si Villar, sa nakalihis na anom na taon na nagkaigwa nin Rice Competitiveness Enhancement Fund, may dakulang improvement sa bagas asin an Rice Farmers and Coconut Industry Development Fund, nagtatabang na mapagayon an kita kan sarong paraoma, kun sain saro an Bicol Region sa mga may produksyon nin bagas, niyog asin abaca.