Nagtuo si Dr. Jaime Bernadas, ang direktor sa Department of Health-7 nga ang presensya sa delta variant sa Covid-19 ang hinungdan sa pagsaka sa kaso sa coronavirus sa rehiyon.
Una ng gikumpirmar sa DOH-7 nga adunay 32 ka covid-19 patient sa rehiyon ang infected sa Delta Variant diin sa nahisgutang ihap, anaa sa 19 ang gikan sa Lapu-Lapu City, unom gikan sa Cebu City, tulo gikan sa Mandaue City, ug tag duha gikan sa Cordova ug Samboan.
Nagtuo hinuon ang DOH-7ang maong mga pasyente, naka-recover na ug ang uban, hapit na maayo gikan sa infection.
Nasayran nga ang ilang swab specimens gi-kolekta niadtong Hulyo 4 ngadto sa Hulyo 10, diin nadawat nila ang resulta human sa 15 ka adlaw o niadtong Hulyo 28 sa gabie.
Sa pagkakaron, gisusi pa sa health bureau kung ang delta variant nga na-detect sa rehiyon, mga imported ba o mugna sa local transmission. Kahinumduman nga ang DOH-7, mipadala ug halos 600 ka mga swab samples aron ipadala sa Philippine Genome Center aron sutaon kung infected ba kini sa Delta variant.