KALIBO, AKLAN—Ginpaandaman it Police Regional Office 6 (PRO-6) do mga law enforcers sa Western Visayas nga likawang makisawsaw sa pulitika eabi eon ag nagahilapit do 2022 National at Local elections.
Suno kay Police Lieutenant Colonel Joem Malong, regional police spokesperson, do nasambit nga paandam hay do ginpaabot mismo ni Philippine National Police (PNP) chief General Guillermo Eleazar kung siin dapat sigon nga tandaan it mga pulis nga do andang papel hay para ipatuman do laye, ipabilin do katawhayan, kaayusan ag seguridad it tanan ag bukon it pulitika.
Dapat man sigon nga likawan it mga pulis do makigulo sa kalibutan it pulitika kamana man indi magpagamit sa mga pulitiko bangud nga do sin-o man nga madakpan ag mapamatud-an nga nagkasaea hay magapangatubang sa kasong administratibo ag possible pang ma-dismiss sa serbisyo.
Samtang, ginpasiguro man ni Malong nga raya hay anda nga ipatupad sa Region 6 ag sa makarun sigon hay padayon do andang ginapatigayon nga monitoring kontra sa potential armed groups sa rehiyon ag do pagpabaskog it kampanya kontra sa loose firearms. // SHERRY ANNE REUNIR-VIDAL