LEGAZPI CITY – Piglalaoman na maisusumiter sa gobyerno-probinsyal kan Albay an detalyadong reports dapit sa mga nagi-illegal quarry sa probinsya antes matapos an Enero 20 ngunyan na taon.
Kaibahan dapat sa report na isusumiter an findings, insights, asin recommended na mga aksyon dapit digdi.
Basado sa kasuguan ni Gov. Atty. Edcel Greco Lagman, pipahidali an mahigot na imbestigasyon sa nasambit na aktibidad.
Nagpaluwas an opisyal nin Memorandum Order No. 75, series of 2023 na nag-oorden sa Provincial Administrator, Provincial Environment and Natural Resources Officers, Provincial Legal Officer, Provincial Engineering Office asin Provincial Treasurer na magkondusir nin marekas asin komprehensibong imbestigasyon sa pinagbabawal na quarry asin dredging operations sa probinsya.
Sinabi ni Lagman na saindang tatawan nin mga legal na aksyon an siisay man na mapatotoohang imbwelto digdi.