LEGAZPI CITY – May pahayag si Councilor Herbert Rodulf Bermas kan Bacacay, Albay dapit sa pagpapakalat nin People’s Initiative form asin pagpirma kan mga residente sa banwaan katakod kan cha-cha.
Sinabi kan konsehal sa saiyang social media post, kun sinda nagpirma sa form, boot sabihon uyon an mga ini na baguhon an Paragraph 1, Section 1 kan Article XVII kan Konstitusyon sa paagi kan People’s Initiative.
Saro su boot ining lakdang nganing magkaigwa ki amendment sa Konstitusyon, bako sa paagi kan mga miyembros kan kongreso o mga eksperto, kundi sa boses asin partisipasyon kan mga tawo.
Sinabi pa kaini na nakabugtak sa orihinal na probisyon na babaguhon an manera kan botohan kan kongreso sa pag-amyendar kan Konstitusyon, kun sain imbis na voting separately an senado asin Kamara, magigin voting jointly na an kaluluwasan.
Segun saiya, kun sasaruon an boto kan duwang chambers, haros maluwas na gari wara ki senado, huli ta nasa 24 man sana an mga senador kumpara sa labi 300 na mga kongresista sa Kamara.
Kun siring an mangyayari, mga kongresista su boot an masusunod asin mawawara an pigsasagbing checks and balances sa kongreso, asin babalgaron kaini ang bicameralism system sa Konstitusyon, kun sain an senado asin lower house an nagpapakusog sa checks and balances sa gobyerno.