Magapangatubang sa kasong pag eabag sa RA 10591 o Illegal Possession of Firearms and Explosives ro sangka 51yo nga LGU-Malay slaughter house supervisor matapos madakpan it mga baril ag bala sa Cubay Sur, Malay, Aklan.
Ginserbi ro search warrant nga gin-isyu ni Hon. Bienvenido P. Barrios Jr., RTC Executive Judge, Kalibo, Aklan, nga may petsang July 23, 2021 kontra sa akusadong si Neil Quintin.
Ginpatigayun ro operasyon kontra sa suspek bangud sa mga nababatun nga impormasyon it mga otoridad halin sa sangka concerned citizens nga nagatago si Quintin it mga armas.
Narekober man sa suspek ro sangka unit it caliber 45 pistol w/ SN 12285303, magazine nga may 7 ammunitions ag extra magazine nga may 4 ammunitions; daywang 40 MM grenade launcher ammunitions; daywang 12-gauge shotgun ammunitions; sangka unit it Homemade improvised 12-gauge Shotgun ag sangka unit it Homemade improvised .22 cal rifle.
Ro nasambit nga operasyon hay gindayaw man ni PCOL Ramir Perlito Perlas, Provincial Director it Aklan PPO bangud raya hay sambilog eonman nga accomplishment sa kampanya kontra sa loose firearms. / ANN DESLENE SALAZAR