GIANGKON ni Tampakan Mayor Leonard Escobillo nga nakuratan siya dihang nasayran sa social media niadtong Lunes ang pag-lift sa ban sa open pit mining.
Wala matud pa siya naga-expect nga mahitabo nga sa kalit lang may desisyon na ang Sangguniang Panlalawigan sa South Cotabato sa pagtugot sa open pit mining.
Dili usab makumpirma ang nasayran nga mga report kung nabayran ang mga board member nga mipabor sa pagpahigayon sa open pit mining.
Gitino ni Escobillo nga basta siya isip lider sa ilang lugar, ang unang gihimo mao ang pagduso og balaod aron maprotektsyunan ang ilang lugar ugaling mahitabo man ang maong matang sa pagmina ug pagkuha og mga ‘mining minds,’ luyo nga andam usab paminawon ang duha ka bahin, sa supak ug uyon sa pagmina.
Basta ipatigbabaw gayud matud pa niini sa iyang pagdesisyon ang kaayohan sa katawhan ug dili sa personal nga kaayohan.
Sa kasamtangan, wala pa nila gi-renew sa LGU-Tampakan ang principal agreement sa SMI.