BOHOL- Nakurat ang mga molupyo sa Barangay Tabuan, sa lungsod sa Antequera duol sa utlanan sa lungsod sa San Isidro sa Probinsya sa Bohol dihang mipukaw kanila ang mga buto sa armas kagahapon sa buntag, Mayo 12, 2023.
Sa press release nga giluwatan sa Armed Forces of the Philippine- Visayas Command, giingong nahitabo ang engkwentro tali sa 47th Infantry Battalion ug sa mga remnants sa nabungkag nga Bohol Party Committee.
Ang maong engkwentro miresulta sa kamatayon sa gituohang teroristang NPA ug ilang narekober ang pipila ka war materials lakip na ang kalibre .45 nga pistola, magazine ug pipila ka buhing bala.
Ang maong hitabo, gikompirmar usab ni Bohol Provincial Police Office (BPPO) director Colonel Lorenzo Batuan.
Giingong walay tropa sa gobyerno ang gikatahong namatay o naangol sa maong insidente og gisusi pa usab kung nganung nahitabo ang engkwentro tali sa mga rebelde og sa tropa sa PA og sa Philippine National Police’s (PNP) Provincial Mobile Force Company (PMFC) .
Nasayran nga mao na kini ang ikaduhang engkwentro nga nahitabo tali sa tropa sa gobyerno og sa mga NPA sulod sa duha ka buwan sa Probinsya diin ang una nahitabo niadtong Marso 10, 2023 diin 30 ka mga pamilya sa Barangay Hanapol Norte, Balilihan ang gihikling human nagpinusilay ang rebelde og mga army.
Subay niini, gidayeg ni Lieutenant General Benedict Arevalo, ang Commander sa Visayas Command, ang mga tropa sa gobyerno sa pagtuman sa ilang pasalig nga tapuson ang lokal nga communist armed conflict sa Visayas Region. //