DUNGAN gipadlak sa lokal nga panggamhanan sa General Santos City ang duha ka balay imnanan o bar, Biyernes sa gabii. Unang gikandado sa mga sakop sa Business Permit and Licensing Division Office (BPLDO) ang ‘Pulse ‘ bar sa Barangay City Heights.
Sunod gipadlak ang ‘Maldita’ bar sa Mabuhay road sa nasangpit nga barangay human misupak sa IATF protocols.
Matud ni Geraldine Zamora, labaw sa BPLDO kapila na kahigayon silang nagpahigayon og inspeksyon sa mga bar sa GenSan.
Nakita nila sulod sa maong mga ‘bar’ ang pagpunsisok sa mga kostumer ug wala pagsuot ug face mask ug face shield sa pipila.
Dugang ni Zamora, tataw nga wala gituman sa tigdumala sa mga establisimento ang mga health protocols. Ilawom sa Modified General Community Quarantine (MGCQ) naa lang sa ‘half’ sa kapasidad sa store ang angayang pasudlon sa bar ug mga restawrant.
Kini ang ikatulong establisimento nga gipadlak sa LGU human ang beach resort nga gipanag-iyahan sa pamilya sa mayor human ang pagpahigayon og ‘reggae night’ luyo sa walay pagtugot sa local IATF. ( Rich Gubalani)