MISAKA na sa 45 ka personahe sa Police Regional Office (PRO) 12 ang positibo karon sa Covid-19, base sa record sa Regional Health Service (RHS). Samtang naa sa 177 ang naka-rekober gikan sa kinatibuk-ang 223 ka mga pulis nga nagpositibo sa nasangpit nga virus.
Sa General Santos City Police Office (GSCPO) misaka na sa 11 ang aktibong kaso sa virus sa rekord gikan Mayo 05 hangtud 15, 2021. Matud ni Major Rissa Hernaez, tigpamaba sa GSCPO ang walo niini nakumpirma na nila apan ang tulo gihulat pa nila ang dokumento asa napatik nga positibo ang mga nasangpit.
Sa kinatibuk-ang ihap, unom niini ang gikan sa San Isidro Police Station, usa sa Pendatun Police Station; usa sa Makar Police Station; usa sa Lagao Police Station samtang usa sa presinto sa Fatima. Butyag ni Hernaez, giimbestigahan na karon kung asa gikan ang virus nga mitakboy sa maong mga pulis sa dakbayan. ( Richel Gubalani)