“We should do our job”, ang mensahe ginpalambot ni Negros Occidental ABC Provincial Federation President, Board Member Juvy Pepello sa mga punong barangays kag sa mga barangay officials sa probinsya madayon man ukon indi madayon ang Barangay kag SK Elections sa bulan sang Disyembre sini nga tuig.
Suno kay Pepello sa linyada sang mga barangay kapitan wala sila sang may mahimo kun iga-postpone ukon indi ang piniliay sa barangay kun sa diin ini ang nakadepende sa desisyon sang mga mamalidha sa manubo nga panalgan sang kongresso, senado kag sa presidente sang pungsod.
Dugang pa ni Pepello pananglitan nga kulabos kag wala sang pundo nga pagagamiton para sa eleksyon sa barangay mas iya pakamaayuhon nga ipaisol ukon wala na lang anay sang patigayunon nga piniliay subong nga tuig.
Sa nahibaluan, gintalana sang Commission on Elections (Comelec) ang Oktubre 6 tubtub 13 , 2022 ang filing period sang Certificate of Candidacy (COC) para sa maluyag sa pagdalagan ukon pagpapili sa palaabuton nga Barangay kag Sangguniang Kabataan Elections
Si Pepello ang kabahin sang mga dinapit nga bisita upod kay Governor Eugenio Jose Lacson, Provincial Administrator Atty. Rayfrando Diaz II, Don Salvador Benedicto Mayor Laurence Marxlen de la Cruz kag NOSP head Karen Dinsay sa paghatag sang scholarship para sa Certificate on Public Administration ang Governance sa una nga batch sang 50 ka mga punong barangays sa probinsya kag induction sang mga class officers. Via| Nimrod Zabala