PAGMUGNA og ‘border control’ cluster ug kusog nga surveillance batok sa Delta variant sa Covid-19. Ang gimandu ni National Task Force (NTF) against Covid-19 Chief implementer Secretary Carlito Galvez Jr., sa pagtambong niini sa ‘closed door meeting’ kauban ang mga lider sa Soccsksargen region, Lunes sa gabii.
Matud ni Galvez Jr., angayang hugtan sa GenSan ang mga ‘sea borders’ aron masiguro nga dili makalusot mga moagi gikan sa Indonesia Island. Kini tungod daghan og mga mananagat nga nagsakay sa fishing boats nga ang operasyon tua sa international waters. Buot usab niini nga mabantay ang mga illegal entry gikan sa maong nasud gamit ang ‘backdoor’.
Gipabantayan usab niini ang ubang local ports nga namasahero gikan sa siyudad padulong sa Balut Island sa Davao Occidental. “Yung sa Gingoog (city) nagsimula daw yun sa port, kaya dapat bantayan ang lahat ng port,” asoy ni Galvez Jr.
Kini ang rason sa pagprayoridad karon sa NTF nga bakunahan ang nagtrabaho sa Fishport complex, fishing industry ug canneries. Sa social media post sa SOCSKSARGEN Federation of Fishing & Allied Industries, Inc (SFFAII) gianunsiyo niini dunay 2,500 dose ang alang sa mga market halls stakeholders.
Apan sa pagbisita ni Galvez Jr., sa dakbayan wala kini nasulti kalabut sa brand sa bakuna nga iturok. Luyo niini, gikan sa 5,000 doses sa bakuna nga gipangayo kaniya sa LGU alang sa mga naa sa industriya gisaka niya kini sa 10,000 doses. Dugay nang ruta sa biyahedor ug traders ang gikan sa GenSan padulong sa kasigbit nga lugar nga mao ang North Sulawesi sa Indonesia. ( Richel Gubalani)