KALIBO, AKLAN—Ginpakamayad it Commission on Elections Aklan nga mag-usoy it mas mabahoe nga venue para sa nakataeana nga filing it Certificate of Candidacy (COC).
Ginpaabot ni Atty. Roberto Salazar, Provincial Election Supervisor lll nga gin-obra nanda do nasambit nga tikang nga obrahong venue do covered court/gym it Aklan Catholic College, Mabasa campus sa Brgy. Andagao, Kalibo bangud nga do andang opisina hay masyadong maisot ag bukon it angay sa pag-file ag pagbaton it COC.
Kinahangean man sigon nga i-konsidera nga masunod do minimum public health standards ag makaangkon it mabahoe nga lugar para sa mga kandidato, media, watchers ag andang mga office personnel.
Do nasambit nga lugar hay do mangin reception it mga maga-file it COC sa position it Member of House of Representatives para sa 1st at 2nd Districts sa Aklan, Provincial Governor, Vice Governor ag mga miyembro it Sangguniang Panlalawigan sa East ag West Districts.
Nasayuran nga maga-umpisa do filing it COC sa October 1 ag magatapos sa October 8, 2021. // SHERRY ANNE REUNIR-VIDAL