BICOL – DAWA padagos pagbaba an mga nairerehistrong kaso nin African Swine Fever o ASF sa rehiyon padagos man an Department of Agriculture o D.A-Bicol sa mga isinasagibo nindang pag aadal dapit digdi.
Segun ki DA Bicol Information officer Emily Bordado, kaipuhan pa man giraray na higot na pag adalan an naobserbaran na “downtrend” sa mga kaso kan helang.
Paghihiras kaini, puon soboot kan paglaog kan 2021 naobserbaran an pagbaba kan mga kaso nin ASF sa iba ibang parte kan rehiyon kun saen gikan sa 73 cases kan Enero, 47 cases para sa Pebrero, sampulo sa Marso asin tolo sana sa nakalihis na bulan nin Abril.
Magigiromdoman na ciento katorseng mga banwaan asin ciudad sa Bicol na binabantayan, sisenta y tres sa mga ini ang naapektaran kan ASF.
Sa ibong kaini, may mga “free zones” pa man giraray sa rehiyon siring na sana kan nagkapirang lugar sa Masbate na marikas na nakontrol an virus.
Presente man na pigpipreparar kan oficina an mga requirements na kaipuhan ma-comply para ideklara na “pink zones” o buffer zone an nagkapirang lugar.
Mantang nagpapadagos man an pigigibong environmental swabbing kan D.A partikular sa mga lugar na dati nang nagrehistro nin mga kaso tanganing madeterminaran kun may traces pa nin virus.
Engkaso soboot kayang magluwas na negatibo an resulta kan sampling saka sana ini bubugtakan nin mga sentinel pigs.
