KABANKALAN CITY, Negros Occidental, Philippines — Kalabira nga nakit-an sa sulod sang campus sang Central Philippines State University sang tinalikdan nga adlaw, Martes, Abril 16, posible isa ka nitibo sang Barangay Camingawan.
Sa interview sang Brigada News FM-Kabankalan kay Dr. Jose Gay Gallego, Director for Historical and Cultural Heritage sang CPSU, sang Sabado, April 13, pa ini naka balo sang may nakutkutan nga kalabira sa lugar kun sa diin gina-renovate ang gym sang buluthu-an.
Dugang pa ni Gallego, nga sa iya nga pag lantaw sang mga tul-an, gabok na ini ka gina-bulubanta nalubong ini masobra 50 na katuig ang nakaligad.
Suno sa iya, ang lugar kun sa diin naga tindog ang gym ang anay lulubngan sang mga nitibo sa lugar, kag ang Nakita nga husay sa kilid sang kalabira ang indikasyon nga isa ini ka babaye.
Dugang pa ni Gallego, nga sa iya nga pag lantaw sang mga tul-an, gabok na ini ka gina-bulubanta nalubong ini masobra 50 katuig na ang nakaligad.
Pahayag man sang manunudlo, indi dapat mag kabalaka ang mga pumuluyo sa nakit-an nga kalabira, bangud ini ang mga butang nga naga-pamatuod sang prisensya sang mga nitibo sang lugar, antis pa ini nangin parti sang masobra 4,000 ka ektaryas nga duta sang buluthu-an.
Dugang pa ni Gallego, nga wala sang may gaka-tabo nga mga pagpatay sa sulod sang unibersidad, suli sa mga alegasyon nga nagatuhaw sa mga paminsaron sang iban.
Gin-klaro man ni Gallego nga una niya na baton ang report nga may nakit-an nga kalabira sa kilid sang gym sang unibersidad sang Sabado, Abril 13.
Ang gym ang gin patindog sang Marso 24, 1954, kag himo pa ini sa kahoy. Gin kay-o kag ginpangalanan ini nga Clemente Sports Complex, bilang pagkilala sa una nga nagin principal sang Negros Occidental National Agricultural School (NONAS) nga si Dr. Dominador Clemente.
Natapos ang kunstraksyon sang gym sa tion sang lidirato ni Dr. Marcelino De Chavez, ang una naman nga nagin presidente sang Negros State College of Agriculture (NSCA).
Gikan sa pagiging NSCA, na-convert ang buluthuan sa Negros Occidental Agricultural College (NOAC) antis naman ini nangin Central Philippines State University (CPSU) sang 2012.
Iga-paidalum naman sa forensic examination sang mga kapulisan ang nakutkutan nga kalabira agud ma tumod kun pila na ini ka tuig nga nalubong, kag kun babaye ukon lalaki gid man ang naga panag-iya sini.*