CAMARINES NORTE- Aabot sa 200 economically displaced individuals sa lalawigan ng Camarines Norte na apektado ng General Community Quarantine (GCQ) ang pinagkalooban ng family food packs ng Department of Social Welfare and Development (DSWD).
Ginawa ang pamamahagi sa isinagawang Provincial Launching ng Duterte Legacy, Barangayanihan Caravan kamakailan.
Pagkatapos ng Provincial Launching ay ginagawa naman ito ngayon sa mga munisipyo at hanggang sa mga barangay.
Matatandaang isinailalim sa GCQ ang probinsiya epektibo noong October 1 na tatagal hanggang sa katapusan nitong buwan.
Dahil dito, apektado ang kabuhayan ng ilan lalo’t may mga establisyimentong hindi pinapayagang mag operate ngayon.
Sa ilalim ng GCQ ipinagbabawal ang pag operate ng mga entertainment venue na may live performances, recreational venues at iba pa.
Ang pagsasailalim sa lalawigan sa naturang quarantine restrictions ng Inter Agency Task Force ay dahil sa pagtuloy na pagtaas ng mga naitatalang kaso ng COVID- 19.
