BICOL – NANGENGENOT pa man giraray an plastik, partikular an mga pinagbugtakan nin mga pagkakan, sa mga basurang nakokolekta sa mga katubigan sa rehiyon segun sa Department of Environment and Natural Resources o DENR-Bicol.
Segun ki Dolly Christine Gato, ecosystems management specialist, base sa saindang trash collection report kasabay kan International Coastal Clean-up day ngunyan na taon, pigkakarkolong maabot sa labi 1,500 food wrappers an nakolekta sa mga coastal zones kan rehiyon.
Kabale digdi an mga patos nin kendi, kape, biskwit, chichiria asin iba pang klase nin junk foods.
An mga upos man nin siragilyo an ikaduwa sa lista sinudan kan plastic bags, foams, grocery bags, asin iba pang plastic wastes.
Mantang an mga gamit na gloves, masks asin iba pang personal protective equipment an kabale man pati na an mga plastic asin glass beverage bottles, asin disposable food containers.
Soboot an mga nabanggit an nagkapira sa mga nagengenot na kawsa kan pagkaraot kan marine habitats and biodiversity loss, kun kaya kaipuhan soboot nin “collaborative effort” para mapugulan an dagos nang pagka pollute kan mga katubigan dahil sa basura.
Pinatotohan man ni Commodore Jose Ma Q. Espeleta kan Philippine Navy an report na ini kan DENR asin sinabing maabot man sa gatos na kilo nin solid waste an saindang nakokolekta sa mga ikinakasang coastal clean-up.
Katakod kaini padagos an rekomendasyon kan DENR sa pagsabay sa curriculum kan mga leksyon dapit sa environmental management siring man an pagpapakusog kan mga kampanya sa proper solid waste management asin marine biodiversity protection.