DILI apektado ang operasyon sa General Santos City airport sa shut down dungan sa gitakdang maintenance sa Civil Aviation Authority of the Philippines (CAAP) air traffic system.
Ang shut down ang gitakda sa Philippine Airspace alas-12 sa tungang gabii hangtud alas-6 sa buntag Mayo 17. Matud ni Joel Gavina, manager sa CAAP-GenSan wala’y flight pahawa ug pasulod sa GenSan sa maong oras. Apan luyo niini, gi-activate na nila ang malasakit desk ugaling dunay pasahero nga manginahanglan og tabang kalabut sa ilang flight.
Kahibaloan nga sulod sa unom ka oras walay aktibidad sa airspace, apan posibleng mapamubo pa ang oras sa maintenance, base sa impormasyon sa CAAP sa kaulohan.
Sa pamahayag atong Abril 28, ang corrective maintenance activity nga himoon sa Philippine Air Traffic Management Center (ATMC) aron morepair sa Automatic Voltage Regulator, aron mailisan ang Uninterruptible Power Supply, ug mag- upgrade sa Air Traffic Management System A/B power supply. I Richel Gubalani