Nakighinun-anon si Governor Fredenil Castro sa mga seafood suppliers sa Capiz kaupod sanday Sylvia kag Joey Dela Cruz sang Office of the Provincial Agriculturist may kaangtanan sa pagahiwaton nga pagsaulog sang Capiztahan 2023 sa masunod nga bulan sang Abril 14 tubtob Mayo 1.
Ginpangayo ni Gov. Castro ang suporta sang mga ini para sa nasambit nga selebrasyon nga isa pa lamang ka patilaw para sa mas ingrande kag pinakadako nga pagpatigayon sang Capiztahan sa masunod nga tuig 2024.
Maga-suplay sila sang seafoods sa magkatuhay nga aktibidad sa Capiztahan. Ginpangayo man dire ang ila sini nga commitment sa mahatag nila nga suplay, presyo kag kalidad sang seafood.
Ginhinyo man sang gobernador nga kuntani hagan-haganon ang paghatag sang presyo agud bilang Seafoods Capital of the Philippines ang Capiz madamo ang makasarang magbakal kag makatilaw sang aton nga produkto kay pinaagi sini mahimo nga magbalik kag mag-agda pa sang iban ang mga ini nga magkadto sa probinsya.
Kaupod man sa sinapol ang Association of Restaurant, Resorts, Hotel of Capiz kag iban pa nga may kaangtanan sa pagpreparar para sa Capiztahan. | Judy Ann Juare