NAABOT na sa konseho sa GenSan ang problema sa waswas o drag racing lakip na ang saba nga tambutso o open pipe muffler.
Kini dungan sa viral nga bidyo sa pagsirko sa motorsiklo sa batan-on sa Fil-Am road, Barangay Fatima GenSan, asa ang batan-on gikaengong lambigit sa aktibidad sa illegal drag racing sa lugar.
Ang insidente ang rason sa pagpatawag kang Police Major Olivar Pauya, labaw sa Traffic Enforcement Unit (TEU) sa Sangguniang Panlungsod (SP). Giangkon usab ni Bise- Mayor Rosalita Nuñez siya mismo ang nasabaan sa mga open pipe muffler nga motorsiklo nga nagkarera. Gipasalig ni Pauya sa mga opisyal sa siyudad nga mas hugtan pa nila ang operasyon batok drag racing ug open pipe muffler.
Makig-alayon usab sila sa mga barangay aron makahatag og edukasyon ngadto sa mga ginikanan aron mahilayo ang mga anak sa pagkadelikado sa pagkarera og motorsiklo. I Richel Gubalani