BUG-AT sa bulsa ang kantidad sa pagpangpalit og ‘human anti-rabies’ vaccine nga una nang gikaengong libre nga ginahatag sa animal bite treatment center nga iya sa gobyerno.
Kini ang pamahayag ni Don Angelo Uayan, taga Barangay Lagao ug pasyente dungan sa gipagula nga pamahayag sa Department of Health (DOH) 12 nga shortage sa maong bakuna karon.
Giangkon ni Dr. Corazon Gloria Rodaje, labaw sa RHU sa Barangay Labangal nga halos wala na sila’y vials sa iyang pasilidad. Sa karon, igo na lang sa pagcheck-up og paghatag og resita sa mga pasyente ang ilang mahatag.
Sa Dr. Jorge P. Royeca Hospital, butyag sa Chief of Hospital nga si Dr. Ryan Aplicador, nasayod sila sa shortage nga maong klase sa bakuna. Hinungdan nga duna sila’y mga supplier nga naga-supply kanila og bakuna human napaakan sa iro.
Sa karon sa RHU- Labangal, naa sa P1, 200-P1, 300 ang kantidad sa bakuna ug kini tunga ang kantidad sa upat ka pasyente. Naa sa 25- 30 pasyente matag adlaw ang naga-adto kanila aron mabakuna ug mo-average kini og 400 matag bulan.
Ang GenSan, dunay duha ka animal bite treatment center nga iya sa gobyerno. Gina-atiman usab sa maong mga pasilidad ang mga pasyente gikan sa kasigbit nga lugar sama sa Kiamba ug Maasim, Sarangani Province. Abril 4, nagpagula ang DOH-12 og advisory kalabut sa nasinatiang shortage sa maong bakuna. I Richel Gubalani