Usa nga lalaki an ginpananawtaw hin usa nga hubog samtang nagdudul-ong hin pagkaon dida han Hunyo 20, 2023 ha Barangay Hiluctogan Kananga Leyte.
Kinilala an biktima nga hi Jeramy Silao, 31 anyos may live in partner samtang kinilala naman an suspek nga hi Manuel Argumido, 39 anyos ngan pareho an mga ini residente han nasabi nga barangay.
Nag-angkon hin grabe nga mga kasamdan ha lawas an biktima nga dayon gindara ha ospital para ha kaangayan nga medikal atensyon.
Ha nakuha nga impormasyon han Brigada News Fm Tacloban, nga tipauli na unta hi Silao mahuman hini magdul-ong hin pagkaon ha panimalay han iya bugto nga babaye.
Ini in kun diin nakit-an ni Silao hi Argumido harani ha panimalay han iya bugto nga hubog ngan nagkamayda an mga ini hin deri pagkakaintindihay nga nangadto pananawtaw.
Dayon naman naaresto han mga otoridad an suspek ngan naatubang hin kaangayan nga kaso.