Pilason ang ulo kag nabali ang tiil sang isa ka lalaki matapos ginaalegar nahulog samtang nagasakay sa tricycle kag nalapakan sang kasugata nga salakyan sa Sitio Agtalin, Brgy. Dulangan, Pilar, Capiz.
Ginkilala ang biktima kay John Mark Vallar, 31-anyos, residente sang Barangay Carmensita, President Roxas samtang, ang driver sang tricycle amo si Jerry Fuentes, 30-anyos.
Sandig sa imbestigasyon sang Pilar Municipal Police Station, samtang ginasubay ni Fuentes ang dalanon halin sa Estancia, Iloilo kag pauli na kuntani sa ila barangay, pag-abot sa kurbadahon nga karsada hinali nalang nahulog si Vallar kag nagtupa ang tuo nga tiil sa pihak nga linya kag aksidente naman nga nalapakan sang ila kasugata nga truck nga ginamaneho ni Jophyl Garcia.
Madasig nga ginpadangat sa Bailan District Hospital ang biktima para sa nagakaigo nga pagbulong.
Ginkustodiya naman sang Pilar PNP si Garcia lakip ang salakyan nga naulamid sa nasambit nga insidente. | Judy Ann Juare