Ginpirmahan na an Memorandum of Agreement (MOA) han Philippine Coconut Authority (PCA) agud matagan hin paglaum ngan makabakdaw na an mga parag-uma hin lubi ha Southern Leyte kataliwan han danyos nga ginbilin han Bagyong Odette.
Ini in ginpirmahan ha pamaagi kan PCA Administrator Bernie Ferrer Cruz ngan Southern Leyte State University (SLSU) ha pangunguna ni University President Dr. Jude Duarte.
Ini nga MOA in naghihingyap nga magtindog hin Coconut Seed Farm ha Segundo Distrito han Southern Leyte.
Nabaruan nga an nasabi nga panalimbasog in kumo kabatunan ha panawagan ni Southern Leyte 2nd District Representative Christopherson Yap ha national government nga mabuligan an coconut industry ha probinsiya nga kalakip ha mga pinaka-naapektaran han bagyo dida han Disyembre 2021.
Mababaruan nga siyahan gin-inspeksyon ni Yap dida han Marso 9, kaupod an mga representante han PCA, SLSU ngan mga lokal nga opisyal an 10 ektarya han tuna nga gintatag-iyahan han SLSU Hinunangan Campus kun diin igtitindog an coconut seed farm. .
Sumala naman kan PCA Regional Manager Engr. Joel Pilapil nga dayon hira magpapadara hin mga eksperto nga inspekyunon hin maupay an sitwasyon ha lugar agud matikangan na an pagtitindog han proyekto ha madagmit nga panhon.