GIDUSO ni Kagawad Lourdes Casabuena, chairperson sa Family and Children’s Welfare and Population Management sa Sangguniang Panlungsod ang resolusyon nga matubag ang mental health problems labi na sa mga estudyante sa GenSan.
Segun niini nga ang problema sa mental health karon labi na sa mga kabataan ang angayang tutukan aron mapugngan ang pagsamot niini ug malikayan ang insidente sa suicide.
Dugang sa konsehal, sa maong problema may dakong papel ang ginikanan ug pinaagi usab sa tabang sa psychiatrist mao nga kinahanglan ang dugang ihap sa mga nahisgutan nga moatinder sa mental health problems sa syudad.
Midaghan matud pa ang problema sa mental health dili susama kaniadto, atol sa pandemya tungod nalimitahan ang mga aktibidad sa mga bata.
Apan daghan pa ang mga factor nga angayang tan-awon, sama sa peer pressure, kulang sa pagtagad ug pag-amoma sa ginikanan, academic pressure ug uban pa.
Alayun usab niini giawhag ni Casabuena ang mga medical student nga mag-specialized sa psychiatry aron matabangan ang mental health problems nga dili modaghan dinhi sa syudad labi na nga aduna lay tulo ka psychiatrist ang GenSan ning panahuna.