Hugot ang pagtuo sa mga higala sa 23 anyos nga lalaki kansa gilambigit sa paglugos-patay kang Vlanche Marie Bragas nga namatay sab human nga gi-atubang sa Kapulisan.
Kahinumdoman nga nangayo og pakitabang si Dennis Roy Panzan, alyas Edot sa mga residente sa Matina Pangi niadtong Lunes sa buntag human sumala pa nga naka-ikyas siya gikan sa mga midagit kaniya.
Apan sa dihang gi-turned over na kini sa Talomo PNP, kalit na lamang kining nawad-an sa iyang panimoot ug daling gidala sa balay tambalanan apan wala na natabang og gideklarang patay na.
Sa pakighinabi sa Brigada News Team sa mga wala nagpailang mga higala ni Panzan nga ilang pa kining nakauban sa gipahigayong despedida party niadtong Mayo 16, 2023 alas 8:00 sa gabie ug nakig-inom kini kanila.
Nakadesisyon kining miuli sa Durian Village, Calinan gumikan duna pa kini ayuhon nga gripo sa iyang tindahan.
Gihatod pa kini sa iyang igsuon sa Crossing Quarry, Tugbok, ning syudad kauban si alyas Jong-jong ug misakay matud pa og PUJ padulong sa Fausta.
Pag-abot sa Crossing Fausta, minaug si Panzan ug nagbaktas padulong sa iyang gipuy-an, gani, nagchat pa kini sa iyang kauban nga si jong-jong alas-12:40 sa gabie nga anaa na siya sa ilang balay.
Apan, human ang nahitabong krimen kang Arch. Bragas, gibali-balikan si Panzan sa mga pulis sa iyang gipuy-an alang sa imbestigasyon.
Wala na sumala pa ka-uyon ug na-alarma na ang pamilya sa biktima sa gihimong imbestigasyon sa kapulisan hinungdan nga nakadesisyon sila nga magpatabang sa Calinan PNP alang sa kaluwasan ni Panzan.
Gisulayan pa nila sa pagkontak si Edot, apan wala na kini mitubag sa iyang cellphone.
Daling gisusi sa kabanay ang gipuy-an ni Panzan ug mao na lamang ilang nasayran nga nakapadlak na lang balay niini og nagkatag ang mga butang sulod sa tindahan ug wala na nila nakita si Dennis.
Mao na lamang ilang nabalitaan adtong Lunes nga nakaabot kini sa Matina nga nabalot ang nawong sa packaging tape ug nakaposas ang mga kamot.
Kasamtangan, anaa ang patay’ng lawas sa biktima sa Villa Funeral Home, ning syudad sa Davao.