NAG IYAHAY og diskarte ang mga panaderya subay usab sa kausaban nga nagahitabo sa mga presyo nga kabahin sa sangkap sa paghimo ug tinapay.
Ang mga kausaban nga ilang ginahimo mao ang pagpataas sa presyo, pagbuhin sa gidak-on sa tinapay o kaha ang pagbuhin sa unod sa putos sa tinapay.
Sumala sa usa ka dalaga nga si Rina Butil, 18-anyos gikan sa Purok Sueza, Barangay Fatima ang iyang paborito mao ang ensaymada gumikan ganahan kaayo siya sa kalami niini, sumala usab kay Joaquin Esplana, pandesal ang iyang paborito.
Sa sulod sa Central Public Market aduna silay mga kausaban nga ginahimo aron nga magpadayon ang ilang negosyo bisan kon nagmahal ang presyo sa asukal ug sa harina.
Sumala kay Rosita Calumpong gikan sa Stall Number 15 sa Phase B Public Market nga nagsugod ang ilang pag adjust sa tinapay kaniadto pang Hunyo 21 hangtud karong Septembre 2022.
Ang ilang gihimo ang uban sa kanhi tag P20 nga putos sa Mini Burger Buns, Kalabasa, Atay-Atay, Hopia nahimo na nga P25 matag putos, samtang ang may kausaban sa gidak-on ang Pig pie, Slice Mammon,ug Bagong bayan nga tinapay.
Sumala usab kay Jenevieve Astrolabio, tindera sa usaka tinapayan sa Fil-Am Road, Fatima nag adjust usab sila sa kabug-aton sa ilang mga tinapay aron nga dili malugi sa ilang negosyo.
Ang tambag sa Vice President sa Consumer Welfare Council nga dili mapugngan ang mga presyo mao nga magtuod kon paunsa makatipid mopalit lang kon unsa ang kinahanglanon sa panimalay. I Ver Diazon