BICOL – Sa ikatulong pagkakataon, liwat na pigrekonusir kan Bangko Sentral ng Pilipinas an National Economic and Development Authority o NEDA-Bicol bilang saro sa “outstanding partners” pag-abot sa implementasyon kan mga polisiya, programa asin adbokasiya dapit sa pangangataman sa ‘monetary stability’ kan nacion.
Segun sa BSP, dakula an naitabang kan napapanahon asin kumpletong impormasyon na ipigtao kan NEDA sa rehiyon para sa pagkrear ninda kan report sa regional economic development of the Philippines kun nsaen soboot naka angkla an nagkapirang mga monetary policies.
Ipinahayag man ni NEDA-Bicol Regional Director Agnes Tolentino, suportado ninda an BSP para sa pagkamit kan ‘resilient and inclusive’ monetary asin financial sector.
Soboot saindang pigbisto an importanteng papel kan BSP para sa pagkamit kan target kan Chapter 15 kan Bicol Regional Development Plan 2017-2022 tanganing masiguro an mga polisiya pag abot sa macroeconomic.
Apwera sa NEDA Bicol, nakaresibe man nin award sa isinagibong 2021 Outstanding BSP Stakeholders Appreciation Ceremony an Camarines Norte Communications Network, Camarines Sur Chamber of Commerce and Industry, Central Bicol State University of Agriculture, Department of Agriculture Region 5, Department of Education Calabanga West District, LCC Malls, National Youth Commission Southern Luzon, Provincial Planning and Development Office-Albay, asin an The Lewis College of Sorsogon.