LEGAZPI CITY – Limitado lamang umano ang papel o kapangyarihan ng National Food Authority (NFA) sa ipinatupad na Executive Order No. 39 ni Pangulong Bongbong Marcos o ang price ceiling sa mga bigas.
Ito ang inihayag ni NFA Bicol Assistant Regional Manager Julie Llenaresas sa Brigada News FM Legazpi.
Aniya, kahit pa nasa ilalim sila ng Department of Agriculture, sila ay dineputize lamang sa pagbibigay ng technical assistance.
Wala umano silang otoridad at kapangyarihan pagdating sa pagpapatupad ng anumang hakbang lalo na kung pagdating sa monitoring dahil ang DA at Department of Trade and Industry ang may hawak nito.
Ayon sakanya, sila lamang ang nakatoka sa pagtukoy ng pagkakaiba ng regular milled at well-milled rice, ngunit hindi sa pag-enforce o ang pagpe-penalize sa mga lalabag.
Matatandaan, nitong nakaraang linggo naging epektibo ang price ceiling sa mga bigas na maglalaro lamang sa mula PHP41-45 ang presyo ng regular milled at well-milled rice.