HUGOT karong gitutukan sa Overseas Workers Welfare Administration-XI ang nahitabong kagubot didto sa Afghanistan ilabi na sa mga apektadong Overseas Filipino Workers nga gikan sa Davao Region aron nga matabangan gilayon sila.
Kini nunot sa mando sa gobyerno nga force repatriation ug pagpauli sa mga Pinoy workers aron dili maipit sa nagpadayong kagubot human nailog sa Taliban Forces ang pwersa sa maong nasud.
Sumala kang OWWA Davao Region labor communications officer Maricel Saradillo, sa karon naghulat pa sila og official statement gikan sa OWWA-Central Office kung dunay mga Dabawenyong nagtrabaho didto.
Hinoon alang sa mga pamilya dinhi sa Davao region nga dunay kabanay nga nabtrabaho sa Afghanistan, mamahimo matud pa nga makig-alayon sa ilang buhatan sa T.Monteverde St, Poblacion District ning syudad.
Subay sa situation bulletin sa Department of Foreign Affairs (DFA), anaa sa 35 Filipinos gikan Afghanistan ang na-evacuate sa ilang mga kumpanya sa Doha, Qatar.
Bandang 4:00 sa hapon kagahapon, naapil ang 35 ka Pinoy sa charterted plane sa kagawaran gikan Doha padulong sa
Maynila sa Ninoy Aquino International Airport (NAIA) Terminal 1 ang grupo.
Kini ang unang batch sa na-repatriate gikan sa Afghanistan nga karon gipabilin sa DFA ang Alert Level 4 o Mandatory Repatriation sa Afghanistan.