Gibana-banang muabot sa 3.9 bilyon pesos ang gibiling danyos sa sa sunog sa usa ka 37 ka andanang condotel sa Brgy. Kasambagan, dakbayan sa Sugbo gahapon sa hapon.
Matod ni SFO3 Wendell Villanueva, tigpamaba sa Cebu City Fire Office (CCFO), nga posibling pinisik sa welding ug ang kawalay kabangkaagan sa mga trabahante sa paggamit og fire extinguisher ang hinungdan sa dakung sunog.
Nasayran nga ang kayo nagsugod sa kinaibabwan sa tower 4 sa condotel ug mikatap paingon sa ubos nga bahin sa edepisyo tungod sa giingong pagkatay niini sa mga wire.
Muabot usab sa 30 ka mga firefighter nga nigamit og breathing apparatus ang nisulod ug nisaka sa condotel aron pagkombate sa kayo.
Samtang alas 7:50 kagabie gideklarar na sa mga bombero nga under control ang kayo, apan posibling madugay pa ang “overhauling” niini tungod sa kataas sa edipisyo.
Ang condotel padayon pang gitrabaho busa wala pay mga tawo nga nag-ukopar, gawas sa mga construction workers nga nagtrabaho.//