LEGAZPI CITY – Epektibo na ngunyan na aldaw an pagpapauruli sa mga bakwit kan Bulkan Mayon na gikan sa banwaan kan Sto. Domingo, Albay.
Kumpwesto ining ki apat na mga barangay, partikularmente an Lidong, Fidel Surtida, Sta. Misericordia asin San Fernando.
Nasa irarom ini kan ipinaluwas na Municipal Disaster Risk Reduction Management Council Advisory No. 003 ni Mayor Jun Aguas.
Nakabugtak sa abiso na padagos an pagbaba kan mga parametro kan bulkan asin wara man nin nakaitar sa 6km permanent danger zone.
Huli kaini, inabisuhan an mga opisyales de barangay na makipagkoordinar sa MDRRMO para sa pagpapauruli kan mga ini.
Mientrastanto, pigsiyerto man kan alkalde na maitatao sa mga bakwit an gabos na asistensya gikan sa LGU asin mga pribadong grupo maski pa nakauli na sinda sa saindang residensya.