PADAYON nga nagpaabot og bayad gikan sa Philhealth ang mga private hospital association sa Gensan, human kining naghatag og konsiderasyon nga mobayad hantod sa Disyembre 15, 2021.
Kahinomdoman adunay wala panagsibo sa record nga nahimong rason sa pagkalangan og bayad sa kapin Php800 milyon nga claim gikan sa philhealth. Matud ni Dr. Renato Diagan Presidente sa Private Hospital Association sa syudad, gipromisa sa philhealth nga mabayran ang 70% nga Covid claims bag-o paman mahuman ang bulan sa Oktubre apan subay sa ilang talaan anaa pa lang sa 7% ang nabayad ngadto kanila ug wala pa kini maabot sa Php140M.
Giangkon ni Dr. Diagan nga naapektuhan ang mga ospital sa maong pagkalangay sa bayad, adunay pipila ka empleyado nga wala pa ma sweldohi ug anaay mga supplier nga wala pa mabayari. Apan nasabtan matud pa niini ang pipila ka rason sa pagka-delatar ug pabilin kining naglaom nga mabayaran sila karung tuiga, aron mapadayon ang operasyon sa mga ospital ug ang pag-serbisyo ngadto sa tanang pasyente. ( Enamie Mogpon)