Pito ka miyembro sa kulto ang nakagawas lakip ang ilang lider human giatake sa mga miyembro ang Provincial Jail of Davao Oriental nga nahimutang sa Purok Maliga, Barangay Sainz, Mati City, Davao Oriental kagahapon.
Sa report gikan sa Mati City Police Station nasayran nga mga sakop matud pa sa Pinatikan Religious Group ang miatake sa maong prisohan kon asa ilang naluwas ang ilang lider nga si Cornelio Galon III lakip ang mga miyembro nga silang Dominador Lintuan, Laudeco Lintuan, Sugaan Gil, Arjowe Lintuan, Ranjay Baluro, ug Inabitan Ismadi.
Nahitabo usab ang binayluay og bala batok sa mga kawani sa Provincial Jail ug kasundalohan kon asa usa ka miyembro sa maong kulto ang napatay og kasamtangan ginaila sa otoridad.
Sa pagkakaron nagpahigayon og hot pursuit operation ang otoridad aron pangitaon ang mga suspek.Kahinumduman nga si Galon nag-atubang og patong-patong nga kaso human nga naaresto kini niadtong Oktobre 2019 gumikan sa paghupot og mga armas sa Barangay Mamali sa nasangpit nga syudad. BNFM-Davao
