IBAJAY, AKLAN—Narekober eon do gintakaw nga lingganay it sangka kapilya sa Brgy. Tagbaya, Ibajay, Aklan.
Suno sa pamunuan it Nuestra Senora dela Immaculada Concepcion, nakita it sangka residente do lingganany sa junk shop sa Brgy. Aquino, Ibajay kung siin suno sa tag-ana hay gindaea raya sa ana nga shop agud nga ipa-welding pero nagpamalibad raya nga isugid kung sin-o do nagdaea.
Matapos nga makumpirma nga raya gidman do ginmaduea nga lingganay hay temporaryo anay raya nga ginbutang sa Brgy. Hall para sa dugang nga imbestigasyon.
Sa pihak nga parte, padayon man nga ginausoy sa makarun do sambilog pang lingganay nga ginapatihan nga gintakaw man sa chapel it Brgy. Aquino kung siin himo raya sa purong tanso.
Nasayuran nga mag-eowas sa lingganay, gintaban man it mga manakaw do amplifier ag mixer it nasambit nga kapilya. // SHERRY ANNE REUNIR-VIDAL